Saturday, May 16, 2009

بلدي أنا حليقات"



يوم الجمعة 15 مايو يصادف ذكرى النكبة ال61 ، بس كمان أنا بعتبر النكبة الكبرى هيه الانقسام الفلسطيني

شو بدنا أكثر من انه الفلسطينيين بقتلوا بعض ، وما بعتقد انه كان مثل ما بنسمع تحت مسمى المصلحة الوطنية العليا ، المقاومة، برنامج سياسي ... للأسف الشديد عشان الكرسي و صارت واضحة زي الشمس .

اليوم اسهرت أنا و أصدقائي للساعة 3 الصبح عشان نحرس جدارية عملوها فنانين عن النكبة ، رسومات رائعة ، إحنا كنا سهرانين عشان ما حدا يمزع الجدارية ، ممكن يكون مقصود حدا من التنظيمات يبعت حدا يمزعها و في الاخر بوسة عالراس أو بيان أسف .

إحياء ذكرى النكبة صار بدو ترخيص ، منيح كتيييير ، ما بعرف بكرا شو راح يتخذوا إجراءات بس انشالله يستثنى العلم الفلسطيني ، الله أعلم يمكن ييجي يوم نحتاج ترخيص لنرفع العلم أو نسمع السلام الوطني ..

على العموم أنا مش عارف إذا بدي ترخيص إني أحكي عن بلدي و أعرفا لناس عليها، بس أنا بدي أنشر على صفحتي و بدعو الجميع ان يشارك و يعمل أنشطة عن فلسطين و قراها و تاريخها ...

بعرف الوضع صعب وصرنا نفكر بلقمة العيش قبل ما نفكر بعكا و حيفا و الرملة و بربرة و هربيا ....

بس برضو هذا مش مبرر نخصص من وقتنا و نكتب أو نحكي عن بلادنا .

أنا فلسطيني بسكن بمخيم جباليا بس بلدنا الاصلية هي قرية حليقات ، احتلها الاحتلال الاسرائيلي في 12 مايو 1948 ، تقع الى الشمال الشرقي من مدينة غزة، وتبعد عنها20.5 كم، وترتفع 100م عن سطح البحر. وتبلغ مساحة اراضيها 7063 دونما وتحيط بها اراضي قرى كوكبا، وبرير، وبربرة، وبيت طيما. قدر عدد سكانها عام 1922 حوالى(251)نسمة، وفي عام 1945(420)نسمة. يوجد بها مواقع اثرية اهمها: خربة سبنس، وخربة مليطا. قامت المنظمات الصهيونية المسلحة بهدم القرية وتشريد اهلها البالغ عددهم عام48 (487)نسمة، وكان ذلك في 20/ 10/ 1948 ويبلغ مجموع اللاجئين من هذه القرية في عام1998 حوالى(2992) نسمة



كل سنة بنقول انشالله السنة الجاية بنرجع عبلادنا و بنقيم دولتنا وعاصمتها القدس الشريف

بس ما بعتقد ، حماس وفتح لليوم مش متفقين على حكومة شبر ونص

بدنا نكون قادرين نرجع لبلادنا و نحررها

ربنا يغير هالحال للأفضل بس لازم كمان إحنا نغير حالنا و نغير هالقيادة