Monday, November 23, 2009

رسالة الي صديقتي مسعدة بمناسبة زيارة الفنان دريد لحام

بمناسبة زيارة الفنان دريد لحام ومحموعة من الفنانين السوريين لقطاع غزة وأيضا بمناسبة سعر التذكرة للقاء الفنانين 120 شيكل أنا كتبت هالرسالة على موقع الفيس بوك "ياجماعة الي بقدر يشوف دريد لحام يقله أدهم بسلم عليك لأنه مامعي 120 شيكل تذكرة المتحف الدنيا اخر شهر الله يسامحه كان اجى باول الشهر زمن العجايب "

الاصدقاء علقوا على الموضوع من بينهم صديقتي العزيزة مسعدة من نابللس قائلة" سلموا عليه وابعتولي اياه هون عالضفه عنابلس نطعميه كناف ".

بس لاتزعل مني يا مسعدة ماراح يزبط ييجي على نابلس للأسباب التالية

أولا انتو ما بتعيشوا زي غزة محاصرين احنا عاملين زوبعة بالعالم والي بدو يشخص بزورنا

بعدين انتو بدخل عنكو غالبية البضائع، احنا بدخل المجمدات واللبن ومشتقاته والمرتديلا المزبطة والحمص وكمان شوية حاجات بنعدو على الاصابع.

بالاضافة انه سياراتكم بتمشي على البنزين والسولار والكاز ولساتكم ما جربتو السيرج والوقود المصري حريقة بخلي السيارة اسرع من النوع الاسرائيلي.

وتنسيش انه انتو ما عندكم أنفاق واحنا عنا واحنا كمان عنا فزب أكثر منكم.

وياحبيبي على الكهربا لسه لازم تجربو اللمضة والشمع المصري الي بضوي الدنيا كلها.

وبعدين احنا انهرينا واحنا بنعطي ستيم للبابور و أبدعنا واعملنى اغنية شحبر يابابور الكاز وانتو لأ .

والشئ الثمين الي بنتميز فيه عنكم بالضفة احنا حكومتنا شرعية وانتو لأ وكمان حكومتنا عندها صواريخ ومضادات جويةوانتو لأ .

عنجد في شغلات كتير احنا بنتفوق عليكو فيها فليش يزوركم دريد لحام .

شو يامسعدة أمامك خيارين يا بصير كل اللي صار عنا معكم وبزوركم دريد لحام ووفود كتير راح تزهقوا وفوووود ، أو بضلي بتشوفي دريد لحام على التلفزيون وبضلوا على حالكم .

تحياتي لك مسعدة وانشالله بنعيش انا وانتي بدولة فلسطينية وعاصمتها القدس وما بدنا حدا يزورنا احنا بنزورهم أحسن.

مع الاحترام والتقدير لكل من ناصر ودعم الشعب الفلسطيني .